聖誕老阿公

阿母用這个故事來教育我,愛我抱著向望過每一工,佇收著禮物的同時,閣再為後一个向望認真拍拚……

0
188
Image by S. Hermann & F. Richter from Pixabay

◎謝清美(台南市)


「北風呼呼吹,啥人對遮過,聖誕老阿伯,禮物揹一大袋……」這首歌若唱起,我的心就真歡喜,因為彼是一冬一擺的日子,會當共心中的向望橐佇眠床頭的襪仔裡,向望所想的攏會當照心意。到甲這馬,我猶原相信美夢會成真,是因為佇我三歲的時,聽著一篇真特別的故事。

彼時阿母講:「有一个聖誕老阿公,伊真疼惜乖囡仔,只要有乖,就會佇平安夜送禮物來喔!」彼一擺我佮阿母就共心內所想欲愛的禮物寫佇字條裡,閣共橐佇襪仔內,想袂到,隔工睏醒有影收著我所佮意的禮物。阿母講因為我真乖,所以聖誕老阿公才會送來。自彼擺開始,我就相信做一个乖囡仔,一定會當收著聖誕老阿公的禮物,甚至佇阮搬厝的時,閣畫一張地圖拜託阿母替我寄予聖誕老阿公,向望伊毋通走毋對路,共我的禮物送去別人兜。

就佇我八歲彼冬的平安夜,為著欲等待聖誕老阿公的出現,人生第一擺歸暝無睏,目睭金金相對窗仔口……結果,予人誠失望。阿母才講:「故事是佇一千六百冬前的土耳其,有一个叫做Nicholas的基督徒,伊真愛幫助人。彼時有一个散凶家庭,有三個查某囝,因為無錢通攢嫁粧,所以攏無嫁。這佇彼陣來講,是真見笑的代誌,Nicholas聽著了後,就佇平安夜偷偷仔peh(爬)上𪜶兜的煙筒頂,共一袋錢橐落起,拄好落佇爐仔邊的襪仔裡。從此以後,漸漸就有聖誕老阿公佇平安夜送禮物的傳說。」

知影真實的故事了後,予我真著驚,想講抑無我逐冬收著的禮物是對佗來的?阿母煞講:「當然嘛是聖誕老阿公啊!因為伊無法度照顧全世界的小朋友,所以予阿母來鬥相共啊!」既然是阿母開錢買的,是按怎欲閣逐冬陪我過節咧?原來阿母是欲用這个故事教育我,愛我抱著向望過每一工,佇收著禮物的同時閣再為後一个向望認真拍拚。

這个故事真特別,對真實的故事到傳說的故事,發展到一个予人有期待的故事,予愛佮希望陪伴世界每一个囡仔大漢,當然嘛包括我。佇遮閣較希望今年的聖誕老阿公會當送予世界一个大禮物,就是這擺的COVID-19從此消失,予世界一个真真正正的平安夜!

備註:作者以台文寫作,此篇文章曾榮獲2020年台南市閩南語語文競賽國小組初賽第一名,原標題是〈一篇特別的故事〉。

Image by Susanne Jutzeler, suju-foto from Pixabay

【讀完這個故事,如有感動可支持編輯刊物的需要】

線上捐款支持耕心文字事工
http://donate.tcnn.org.tw/1
包括郵資、印刷、人事庶務等,《耕心》每月至少需支出90萬元,如果你喜愛這份小小刊物,邀請你透過捐款奉獻,幫助我們在發行經費上無後顧之憂,使眾人同享福音的好處。