佇phun桶邊ê耶穌

0
40
(相片提供/Pixabay)

◎ Lîm Phek-tông(台南市)


耶穌若降生佇phun桶內抑是桶仔邊,敢有人欲去看?
現在ê教會,敢有人會去看khû佇phun桶邊péng食ê流浪漢?

十冬前,我猶是一個神學生,會記得彼年佇教會上無閒ê十二月,有一日,我坐佇台南神學院ê教堂內,聽羅光喜教授講述民數記22至24章巴蘭ê故事,心內有真大ê感動。彼个講道予我留下真深ê印象,敢若有一粒星對天頂劃過,予我看著聖誕後壁另外一沿ê啟示,羅牧師伊按呢講:

彼時,以色列人經過死海東爿往北行,來到約旦河東,準備欲向西進入應允 ê 地。但是,佇死海東爿 ê 摩押,毋但無欲hō͘以色列人通過,甚至koh叫巴蘭來咒詛以色列。後來,巴蘭講神喻,總共作四首歌。

予我真希奇ê是,這个巴蘭是外邦人,毋是以色列人,上帝竟然會通過外邦人ê術士,來賜福hō͘ 以色列人。民數記24章2節講:「巴蘭攑目,看見以色列人照支派徛起。上帝ê神就臨到伊。」

咱掠準上帝ê神獨獨會降臨佇基督徒、降臨佇以色列人ê身上,毋過,佇遮,逐家必須注意,上帝ê神是降臨佇非基督徒kap非以色列人身上。上帝ê神臨到巴蘭。佇異邦ê術士身上,竟然也有上帝ê神。佇24章17節,巴蘭講出一句話:「有一粒星欲對雅各出,有一個權柄欲對以色列興起,欲拍破摩押ê邊角,毀壞擾亂ê人。」佇馬太福音嘛有出現一粒星,馬太福ê星指出耶穌降生ê所在:馬槽。

馬槽是飼馬ê所在,咱台灣真少人飼馬,較四常是飼豬。馬食草,豬食phun。咱用台灣ê情景來想,耶穌若降生佇phun桶內抑是桶仔邊,敢有人欲去看?現在ê教會,敢有人會去看khû佇phun桶邊péng食ê流浪漢?敢有教會欲去kā看?真少。咱台灣現在ê教會大部分真高尚,按呢做ê人真少。古代ê偤太人嘛仝款,ê祭司、文士,無人欲去看降生佇馬槽ê耶穌;反轉,是非偤太人ê星象家對東方來看耶穌。

經文hō͘咱啟示。偤太人是有信仰ê團體代表,竟然毋知上帝ê子已經降世。咱是有信仰ê基督教會,今仔日敢有去看、去照顧一个需要佇phun桶內揣食物來得著飽ê兄弟姊妹?

佇phun桶內揣食ê兄姊嘛是上帝ê子,攏有上帝ê形像。無論是牧師、長老、執事抑是會友,每一位基督徒攏是上帝 ê 僕人,咱敢會知影愛去照顧這款人?若是教會干焦家己關佇圍牆仔內面唱歌、跳舞、禮拜,按呢,上帝只好越頭離開教會,去使用願意實行祂旨意ê人。

 

【讀完這個故事,如有感動可支持編輯刊物的需要】

線上捐款支持耕心文字事工

https://donate.pctpress.org/

包括郵資、印刷、人事庶務等,《耕心》每月至少需支出90萬元,如果你喜愛這份小小刊物,邀請你透過捐款奉獻,幫助我們在發行經費上無後顧之憂,使眾人同享福音的好處。