◎李秀鑾（台南市）
時間行真緊，從回想中發現我的聖詩已經閒閒沒代誌，日日睏飽飽做伊家己的夢，除了司琴的時陣會招伊來找看有啥物通好做前奏，我佮伊愈來愈少有親密的交通、做伙謳咾天父
抑是感謝耶穌的機會，也因為現代詩歌的激情氣口，將伊內面思考、反省、認罪、宣告、謙卑的柔情壓過矣！
總是，有時陣練琴的時，我會閣招伊來，做伙數念囡仔時向耶穌sai-nai（撒嬌）、做伙唱阿爸阿母最愛的詩歌，彼時心內就親像啖著泉水甘甜的滋味。細漢的時，阿爸、阿母攏真無閒，為著六個囡仔拍拚生活，沒機會予阮囡仔的感情得到飽足，這首〈細漢囝仔的朋友〉，滿足我是一個古錐囡仔的心情，給我恬恬享受被疼惜的純真，佇受委屈的時，相信我猶原是上帝的寶貝，因為耶穌疼我，知影我心內的事。雖然這馬年歲較大矣，這首歌嘛是仝款予我一種純真的感覺。
有時陣心內數念阿爸，就會想起伊上愛的詩歌〈時刻我欠用主〉。阿爸一生雖然卑微，伊的正義感卻是值得謳咾，伊定定幫贊弱小、替人擔責任。這首詩歌感動我，予我看見上帝的奇妙，伊知影每一个人的需要，安慰每一粒受傷的心，閣予每一个人大大的向望。阿爸過身進前，一直共阮講：「耶穌應允欲予咱大大的福氣！」這句話嘛有安慰著我心內對阿爸的虧欠。
阿母欲過身進前，阮互相依倚，感情厚閣實。伊閣健康的時，阮兩人時常佇厝內吟詩謳咾上帝，有時我彈琴、有時做伙唱伊上愛唱的〈我心大歡喜，我的嘴著吟詩〉，這首嘛是古錐古錐的詩歌，充滿依靠、信心、軟弱的時受保守的氣力，「雖然對敵來，敢看輕，閣恥笑，猶久主互我通求叫。」
阿母在世真有智慧，伊提出足好的意見，幫公司做好資源管理，將看起來沒路用的材料閣再利用，免得財務損失，這嘛予阮有濟濟的學習佮勉勵。數念阿母的時，就想起伊的智慧，對細漢就嚴格要求阮囡仔一定要去教會，無論去教會的路途有偌爾遠，攏袂使貧憚。就按呢，今仔日的我愛彈琴、愛看冊、會寫詩，攏是因為有阿母的好模樣，對信仰有堅持。
聖詩是我人生的第一个醫治者，每一擺禮拜的時，伊親像燈塔引導我行正路，困難的時予我信心，感受主對我的勉勵，共我掠牢牢，做我生命真好的根基。除了頂面講的三首詩歌，猶閣有濟濟和我的生活相關、予我榮耀恩典的詩歌，雖然這馬有真濟現代詩歌嘛真感動人，但是聖詩的四部和聲是現代詩歌袂當比並的。向望有智慧的人會當共聖詩改編做適合詩班獻詩的曲，保留詩歌較深的音樂美學、較寬闊的音樂文化，毋是為著表演，是一種安慰，嘛會當活潑長輩的信仰生命。
備註：本篇內容所引聖詩皆為台語聖詩，作者以台語書寫更貼切其情。
【讀完這個故事，如有感動可支持編輯刊物的需要】
線上捐款支持耕心文字事工
包括郵資、印刷、人事庶務等，《耕心》每月至少需支出90萬元，如果你喜愛這份小小刊物，邀請你透過捐款奉獻，幫助我們在發行經費上無後顧之憂，使眾人同享福音的好處。
